يالله لاتقطع رجاء كل مشتاق

يالله لا تقطع رجاء كـل مشتـاق
بأمرك يارب , الحلم يصبح حقيقة

انا ادري ان الوصل تاليه الافراق
ولولا الامل ما تحمل النفس ضيقه

امس سرى في تالي الليل بـراق
قلبـي يفـز لنوضتـه بتخفيقـه

وسم ٍ بكور ٍ صادق الوبل دفّـاق
لا شافه الضميـان يبّتـل ريقـه

علّه على دار الوفاء دار الاشواق
دار ٍ صفت لاهل القلوب الرقيقه

فارقتهم مع ليلة ٍ خاطري ضـاق
واليوم للسلوان ماجيـت طريقـه

ياكود حرف اللي كتبته بالاوراق
مثل السراب اللى يسلـي بريقـه

والله لو كـل المخاليـق عشّـاق
ماشفت لك نفسٍ تعـذّب دقيقـه